Fylkesstatistikk 2025 - 4. Sysselsetting og næringsliv

Møre og Romsdal er Noregs nest største cruisefylke, og Ålesund er landets mest populære cruisedestinasjon

Berre Vestland fylke har fleire cruiseanløp til saman enn Møre og Romsdal. I alt var det 651 cruiseskipanløp i fylket i 2024, med til saman 1 479 549 passasjerar. Det utgjer 18 prosent av alle cruiseskipanløp, og 25 prosent av alle cruisepassasjerar i Noreg.

656 678 passasjerar hadde Ålesund som destinasjon i 2024 som med det er Norges største destinasjon for cruiseturistar, framfor Bergen og Stavanger på 2. og 3. plass. Geiranger/Hellesylt var landets 4. største destinasjon, med 510 049 passasjerar. Også Molde og Åndalsnes var destinasjon for eit betydeleg tal cruisepassasjerar; i alt 189 186 og 96 835 i 2024.

Cruisetrafikken er godt over nivået frå før pandemien

Sidan 2010 er talet på cruisepassasjerar i Møre og Romsdal nesten firedobla. Det var ein vekst i både tal på passasjerar og anløp fram mot 2019, før tal på besøk kollapsa i 2020 og 2021. Næringa kom likevel sterkt tilbake etter pandemien, og allereie i 2022 var både tal anløp og tal passasjerar høgare enn 2019-nivå.

Juni til august er den heilt klare høgsesongen for cruisetrafikken i Møre og Romsdal, både med tanke på talet på anløp og passasjerar. Nesten 60 prosent av alle cruisepassasjerar som besøkte fylket i 2024 gjorde det i løpet av desse tre månadene. Likevel hadde Møre og Romsdal cruiseanløp gjennom alle årets månader i 2024, og tendensen dei siste åra er at cruisesesongen har blitt lenger enn tidlegare år.

Vanskeleg å talfeste verdiskapinga av cruisetrafikken

‍Cruiseturismen gir grunnlag for auka sysselsetting og verdiskaping i turistnæringa direkte, så vel som i detaljhandel, service- og transportnæringar. Det er likevel utfordrande å berekne både dei direkte, indirekte og induserte sysselsettings- og verdiskapingsringverknadene cruiseturismen gir samla sett for Møre og Romsdal.

I følgje ei kartlegging på oppdrag for Molde og Romsdal Hamn IKS hadde cruiseturistar i Molde og Åndalsnes i 2023 eit estimert forbruk på 128 millionar kroner. Dette forbruket blei berekna til å gi ringverknadar i form av 52 millionar kroner i verdiskaping, og 115 sysselsette personar i regionen.