Industrien veks, men samla sett er det litt lågare verdiskapingsvekst i Møre og Romsdal enn snittet av fastlands-Noreg
I følge fylkesfordelt nasjonalrekneskap var den samla verdiskapinga i Møre og Romsdal, målt som basisverdi av bruttoprodukt, i 2022 på 146,6 milliardar kroner. Det utgjer ei volumauke på 4,2 prosent frå 2021, som er noko lågare enn snittet for fastlands-Noreg (4,9 prosent) men høgare enn snittet for Noreg inkludert kontinentalsokkelen (3,6 prosent).
Særleg olje- og gassektoren med tilhøyrande tenester hadde stor verdiskapingsvekst i Møre og Romsdal i 2022, med ei volumauke på heile 64,4 prosent målt mot 2021. For industrien samla var volumauka på 10,7 prosent. Brote ned på verksemd var det høgst vekst innan metallproduksjon (56,6 prosent) og verft- og transportmedelindustri (41,6 prosent). Også overnattings- og servicenæringa samt transportnæringa hadde høg volumauke med høvesvis 25,1 og 18,6 prosent. Offentlege tenester hadde samstundes låg volumauke i Møre og Romsdal, med 1,7 prosent for offentleg administrasjon og forsvar, 1,7 prosent for undervisning og 1,9 prosent for helse- og omsorgstenester. Fiske, fangst og akvakultur hadde størst negativ volumutvikling i 2022 (-26,3 prosent), følgt av oljeraffinering, kjemisk og farmasøytisk industri (-22,9 prosent) og post og distribusjonsverksemd (-17,5 prosent).
Helse- og omsorgstenester var den største enkeltnæringa, med ei samla verdiskaping på 20 mrd. kroner. Tenesteytande næringar var den største sektoren, med ei samla verdiskaping på 53,2 mrd. Verdiskapinga i fylket direkte knytt til olje og gass er på si side forholdsvis liten i forhold til kor mange i Møre og Romsdal som er sysselsett direkte eller indirekte i næringa. Årsaka er at brorparten av verdiskapinga i olje- og gassindustrien reknast for kontinentalsokkelen samla, og tal er difor ikkje tilgjengelege for enkeltfylke.
Midt på treet i verdiskaping per innbyggar, og svak verdiskapingsvekst per sysselsett
Per innbyggar var verdiskapinga i 2022 for Møre og Romsdal 547 648 kroner, mens den per sysselsett var på 1 112 251 kroner. Verdiskapingsveksten frå 2021 per sysselsett var på 10,8 prosent, mens snittveksten for fastlands-Noreg var på 21 prosent i same periode. Snitt-tala for fastlands-Noreg påverkast i stor grad av Oslo, som har langt høgare verdiskaping både per innbyggar og sysselsett enn landet elles.
Møre og Romsdal er størst på eksport og konkurranseutsett næring per sysselsett
I 2024 arbeidde 63,6 prosent av dei sysselsette i Møre og Romsdal i privat sektor. Medrekna offentleg eigde føretak var andelen 67,9 prosent. Det er noko lågare enn for Noreg samla (64,3 prosent). Samtidig var Møre og Romsdal i 2024 det fylket i landet med høgst relativ sysselsettingsandel innanfor såkalla konkurranseutsett næringar. Det vil si næringar som i stor grad konkurrerer med utanlandske verksemder. Møre og Romsdal er også landets mest eksportintensive fylke per innbyggar, og både arbeidslivet og verdiskapinga er difor utsett for etterspørselstrendar i utlandet, valutasvingingar og verdikjedebrot.