God inntektsvekst i Møre og Romsdal
I Møre og Romsdal auka den gjennomsnittlege bruttoinntekta med 33 500 kroner frå 2022 til 2023. I 2023 var den gjennomsnittlege bruttoinntekta i fylket på 557 000 kroner, til samanlikning var bruttoinntekta nasjonalt på 583 900 kroner. Nasjonalt vaks bruttoinntekta med 33 000 kroner frå 2022 til 2023. I prosent vaks den gjennomsnittleg bruttoinntekta i fylket med 6,4 prosent mot 6,0 prosent nasjonalt. Gapet i forhold til det nasjonale inntektsnivået er dermed vorte litt mindre, men framleis er den gjennomsnittlege bruttoinntekta 26 900 kroner høgare nasjonalt enn i Møre og Romsdal.
Høge inntekter i Herøy
Det er i Herøy kommune vi finn den høgaste gjennomsnittlege bruttoinntekta, med heile 613 200 kroner. Spesielt høg er den for menn i Herøy, som i 2023 hadde ei bruttoinntekt på 791 000 kroner. Av dei tre største byane er bruttoinntekta høgast i Ålesund med 582 600 kroner. I Molde og Kristiansund var den samla bruttoinntekta på 565 800 kroner og 547 800 kroner i 2023.
Høgast medianinntekt i 2023 er det i Giske kommune med 508 400 kroner. Medianinntekta for Møre og Romsdal var same år på 499 000 kroner. Fjord kommune hadde den lågaste medianinntekta med 450 500 kroner dette året.
Stort inntektsgap mellom kvinner og menn
I 2022 tente kvinner i fylket 68,1 prosent av menn si inntekt, dette har auka til 69,3 prosent i 2023. Det betyr i kroner og øre at menn i Møre og Romsdal hadde ei gjennomsnittleg bruttoinntekt som var 201 800 kroner høgare enn kvinner i 2023. Inntektsgapet mellom kvinner om og menn er redusert dei siste tiåra, til dømes tente kvinner i fylket 54,1 prosent av menn si inntekt i 1994. Ser vi heile landet under eitt tener kvinner 71,8 prosent av menn si inntekt. Kvinnene i fylket tener med andre ord litt mindre i forhold til menn enn det nasjonale snittet.