Auka sysselsetting i fleire næringar
Talet på sysselsette i fylket auka med 920 personar, frå 132 757 i 4. kvartal 2023 til 133 677 personar i 4. kvartal 2024. I same periode auka sysselsettinga nasjonalt frå 2 845 307 til 2 863 316 sysselsette, ein auke på 181 774 personar. I prosent auka sysselsettinga i fylket med 0,7 prosent i denne perioden mot 0,6 prosent nasjonalt. Veksten i talet på sysselsette er med andre ord litt sterkare i Møre og Romsdal denne perioden, enn for landet som heile.
Vekst i sysselsettinga i industrien
Trass i at landet har vore inne i ein periode med auka renter og auka prisar på varer og tenester, har sysselsettinga halde seg høg i heile denne perioden.
Frå 4. kvartal 2023 til 4. kvartal 2024 auka sysselsettinga i industrien i fylket frå 19 325 personar til 20 101 personar, ein vekst på 776 personar eller 4,0 prosent. I perioden 2020-2024 var det i industrien i fylket ein vekst i talet sysselsette på 1 222 personar eller 6,5 prosent. Den sterkast veksten i sysselsettinga i denne næringa har kome i siste delen av denne perioden.
Høgast prosentvis vekst i talet på sysselsette er det i næringa bergverk og utvinning. Frå 4. kvartal 2023 til 4. kvartal 2024 auka sysselsettinga i næringa med 237 personar eller 10,1 prosent. I 4. kvartal 2024 var det i Møre og Romsdal 2 574 sysselsette i denne næringa. Fleire andre næringar hadde òg god sysselsettingsvekst dette året, til dømes var veksten i sysselsettinga på 5,5 prosent i næringa overnattings- og serveringsverksemd og 3,8 prosent i næringa transport og lagring.
Nedgang i sysselsettinga i byggenæringa
Med auka rente dei siste åra har byggenæring slitt i motbakke. Dette er ei næring som er svært følsam for endringar i renta, noko som i stor grad påverkar aktivitetsnivå og etterspurnaden i denne næringa. Frå 4. kvartal 2023 til 4. kvartal 2024 gjekk sysselsettinga i denne næringa ned med -301 sysselsette eller 2,8 prosent. I 4. kvartal 2024 var det 10 286 sysselsette i næringa bygge- og anleggsverksemd. Ser vi perioden 2020-2024 under eitt, har talet sysselsette auke med 2,0 prosent i denne næringa. Det er i 2023 og særleg i 2024 at talet sysselsette i næringa har gått ned. Vi ser òg ein nedgang i talet sysselsette i fleire andre næringar, til dømes gjekk talet på sysselsette i næringa jordbruk, skogbruk og fiske ned med -2,2 prosent frå 4. kvartal 2023 til 4. kvartal 2024.